චමරිගේ සුපිරි ඉනිමෙන් ශ්‍රී ලංකාව අවසන් මහා තරගයට

චමරි අතපත්තුගේ විශිෂ්ට නොදැවුණු ලකුණු 83ක ඉනිම හේතුවෙන් පාකිස්තානයට එරෙහිව කඩුලු 8ක පහසු ජයක් වාර්තා කළ ශ්‍රී ලංකා කාන්තා කණ්ඩායම ආසියානු ක්‍රීඩා උළෙලේ කාන්තා ක්‍රිකට් තරගාවලියේ අවසන් මහා තරගයට සුදුසුකම් ලබා ගත්තේය.

තරගයේ පළමුව පන්දුවට පහරදුන් පාකිස්තාන කණ්ඩායම පන්දුවාර 20 අවසානයේ කඩුලු 4ක් දැවී ලකුණු 177ක් රැස් කළ අතර, එම ඉලක්කය ශ්‍රී ලංකාව පන්දුවාර 19.3කදී කඩුලු 2ක් පමණක් දැවී පසුකර ගියේය.

ශ්‍රී ලංකා ඉනිම මෙහෙයවූ නායිකා Chamari Athapaththu පන්දු 50කදී හයේ පහර 6ක් සහ හතරේ පහර කිහිපයක් සමගින් නොදැවී ලකුණු 83ක් රැස් කරමින් ජයග්‍රහණය තහවුරු කළාය.

ඇයගේ ඉනිමත් සමග ශ්‍රී ලංකාව සාර්ථක හඹා යාමකදී තමන්ගේ ඉහළම T20I ලකුණු සංඛ්‍යාව සම කිරීමටද සමත් විය.

ශ්‍රී ලංකා ඉනිම ආරම්භයේදී Imesha Dulani වේගවත් පිතිහරඹයක නිරත වෙමින් පළමු පන්දුවාර හතර තුළ හතරේ පහර 5ක් සමගින් පන්දු 21කදී ලකුණු 27ක් රැස් කළාය.

ඉන් අනතුරුව තරගයේ වේගය සම්පූර්ණයෙන්ම වෙනස් කළ Athapaththu, පන්දුවාර 8දී Momina Riasatට එරෙහිව 6, 4, 6, 4 ලෙස ලකුණු 20ක් ලබා ගනිමින් සිය ප්‍රහාරය ආරම්භ කළාය.

ඇයට අනගි සහායක් ලබාදුන් Hasini Perera පන්දු 26කදී ලකුණු 42ක් රැස් කළ අතර, Athapaththu සමග එක්ව තුන්වැනි කඩුල්ල සඳහා පන්දු 56කදී ලකුණු 95ක සබඳතාවක් ගොඩනැගුවාය.

Hasini දැවී යන විට ශ්‍රී ලංකාවට ජයග්‍රහණය සඳහා පන්දු 36කදී ලකුණු 47ක් අවශ්‍යව තිබූ අතර, Athapaththu සහ Harshitha Samarawickrama එක්ව පන්දු 23ක් තුළම එම ඉලක්කය සම්පූර්ණ කිරීමට සමත් වූහ.

පාකිස්තානයෙන් ලකුණු 177ක්

පළමුව පන්දුවට පහරදුන් පාකිස්තානය ශ්‍රී ලංකාවට එරෙහිව සිය ඉහළම T20I ලකුණු සංඛ්‍යාව වාර්තා කළේය.

Ayesha Zafar වේගවත් පිතිහරඹයක නිරත වෙමින් පන්දු 40කදී හතරේ පහර 9ක් සහ හයේ පහර 2ක් සමගින් ලකුණු 71ක් රැස් කළාය.

ඇය සහ Shawaal Zulfiqar එක්ව තෙවැනි කඩුල්ල සඳහා පන්දු 70කදී ලකුණු 115ක සබඳතාවක් ගොඩනැගූහ.

Zulfiqar සිය දෙවැනි T20I අර්ධ ශතකය වාර්තා කරමින් පන්දු 50කදී ලකුණු 54ක් රැස් කළාය.

කෙසේ වෙතත්, Zafarගේ වේගවත් ලකුණු රැස්කිරීමෙන් පාකිස්තානය තරගකාරී ලකුණු සංඛ්‍යාවක් ගොඩනගා ගත්තද, ශ්‍රී ලංකා පිතිකාරිනියන්ගේ ප්‍රහාරාත්මක පිතිහරඹය හමුවේ එම ලකුණු සංඛ්‍යාව ආරක්ෂා කර ගැනීමට ඔවුන්ට නොහැකි විය.

පාකිස්තානය – 177/4 (20)
Ayesha Zafar 71, Shawaal Zulfiqar 54

ශ්‍රී ලංකාව – 181/2 (19.3)
Chamari Athapaththu 83*, Hasini Perera 42

ශ්‍රී ලංකාවට කඩුලු 8ක ජයක්.