එඩ් ජොයිස් අයර්ලන්තයේ නව පිතිකරණ පුහුණුකරු ලෙස පත් කෙරේ

අයර්ලන්ත ක්‍රිකට් ආයතනය හිටපු ජාත්‍යන්තර ක්‍රීඩක එඩ් ජොයිස් ජ්‍යෙෂ්ඨ පිරිමි කණ්ඩායමේ ඉහළ කාර්යසාධන පිතිකරණ පුහුණුකරු ලෙස පත් කර තිබේ.

ජොයිස් වහාම සිය නව වගකීම භාරගන්නා අතර, අයර්ලන්ත ජාතික පිරිමි කණ්ඩායමේ පිතිකරණ අංශය සමඟ කටයුතු කිරීමට අමතරව, පිරිමි ක්‍රීඩකයන්ගේ දක්ෂතා සංවර්ධන වැඩසටහන් සඳහාද දායක වීමට නියමිතය.

අයර්ලන්තය සහ එංගලන්තය යන රටවල් දෙකම නියෝජනය කරමින් ජාත්‍යන්තර ක්‍රිකට් ක්‍රීඩා කළ ජොයිස් 2018 වසරේදී ක්‍රීඩකයෙකු ලෙස සමුගත්තේය.

ඉන් අනතුරුව ඔහු අයර්ලන්ත කාන්තා කණ්ඩායමේ ප්‍රධාන පුහුණුකරු ලෙස කටයුතු කළ අතර, වසර හයකට ආසන්න කාලයක් එම තනතුරේ රැඳී සිටියේය. ඔහු 2025 අප්‍රේල් මාසයේදී එම තනතුරෙන් ඉල්ලා අස්විය.

පසුව ජොයිස් එංගලන්ත County ක්‍රිකට් තරගාවලියේ ග්ලොස්ටර්ෂයර් කණ්ඩායමේ පිතිකරණ පුහුණුකරුවෙකු ලෙසත්, ETPL තරගාවලියේ ඩබ්ලින් ගාඩියන්ස් කණ්ඩායමේ පුහුණුකරුවෙකු ලෙසත් කටයුතු කළේය. එමෙන්ම ඔහු ක්‍රිකට් විස්තර විචාරකයෙකු ලෙසද කටයුතු කර තිබේ.

නව තනතුර පිළිබඳ අදහස් දක්වමින් ජොයිස් සඳහන් කළේ අයර්ලන්ත ක්‍රිකට් සමඟ නැවත සම්බන්ධ වීම තමන්ට වැදගත් අවස්ථාවක් බවයි.

“ක්‍රීඩා කිරීමෙන් සමුගත් පසුත් අයර්ලන්ත ක්‍රිකට් සමඟ සම්බන්ධ වී සිටීම මගේ ප්‍රමුඛතාවක් වුණා. පසුගිය වසර කිහිපය තුළ අයර්ලන්ත පිරිමි කණ්ඩායම දෙස බැලූ විට, ජාත්‍යන්තර මට්ටමේ තරගකාරී කණ්ඩායමක් නිර්මාණය කිරීමට පිටුපසින් විශාල වැඩකොටසක් සිදුවී ඇති බව පැහැදිලියි.”

ජොයිස් තවදුරටත් සඳහන් කළේ කණ්ඩායමේ පිතිකරණ අංශය ඉදිරියට ගෙන යාමට තම අත්දැකීම් සහ දැනුම ලබාදීමට බලාපොරොත්තු වන බවයි.

ජොයිස් අයර්ලන්ත පිරිමි කණ්ඩායමේ ප්‍රධාන පුහුණුකරු ගැරී විල්සන් සහ ඉහළ කාර්යසාධන අධ්‍යක්ෂ ග්‍රේම් වෙස්ට් සමඟ එක්ව කටයුතු කිරීමට නියමිතය.

අයර්ලන්ත පිරිමි කණ්ඩායමේ අවසන් තරගාවලිය වූයේ අගෝස්තු මාසයේදී ඇෆ්ගනිස්තානයට එරෙහිව පැවති එක්දින තරග පහක තරගාවලිය වන අතර, එහිදී ඔවුන් තරගාවලිය 4-0ක් ලෙස පරාජයට පත්විය.

ඔවුන්ගේ මීළඟ ප්‍රධාන අභියෝගය වන්නේ 2027 එක්දින ලෝක කුසලාන සුදුසුකම් ලැබීමේ තරගාවලිය වන අතර, එය 2027 පෙබරවාරි 22 සිට මාර්තු 23 දක්වා පැවැත්වීමට නියමිතය.